Monday, February 24, 2014

केही किनारा लाग्नेछन्

बेगसँग हुत्तिने शोषणको छाल बनेर
मानिसका मिहेनत बगाएर सोहोरौं भन्नेहरू
पसिनाले सिंचेर भर्खरी टुसा उम्रेका इमानलाई
जबर्जस्ति घुसपैठको आहालमा डुबाउँ भन्नेहरू
तेस्तो गर्न केहीको मन नमान्न सक्छ
तेसैले ती किनारा लाग्नेछन्

भोक, अभाव, अनि गरिबीका भावना छुँदै
मान्छेको फौज सँगालेर
शान्ति अनि सुव्यवस्था ल्याउने भनेर
मान्छेनै मारौं भन्नेहरू
विकास र निर्माणको गन्तब्य पुग्ने भन्दै
भएका सडक, पुल, अनि सभ्यतानै भष्म पारौं भन्नेहरू
तेस्तो सोच केहीले नराख्न सक्छन्
तेसैले ती पन्छिनेछन्

समाज सेवा गर्ने भनेर
संस्था खोलेर चन्दा उठाई
आ-आफ्नै भोगकोलागि घर बनाउने
आफ्नै आफन्त अनि इस्टमित्रमा बाँड्ने भन्नेहरू
विदेशको बिलाशमा आफ्ना लागि भरमग्दुर बटुल्न खोज्ने
तर जन्मभूमिका असाहाय निमुखालाई वास्ता नगर्ने भन्नेहरू
मातृभूमिका भोका अनि लाचारलाइ चटक्क बिर्सनेहरू
तेस्तो गर्न सबको चेतनाले दिदैन
तेसैले केही तिमीहरूबाट अलग हुनेछन्

धर्म गर्ने भनेर
दुईचार जना बटुलेर ठुला ठुला कुरा गर्नेहरू
अनि दीन दुखिका लागि होइन
आफ्नै सम्बृद्ध समाजका लागि
कसरी फाइदा लुट्ने भनेर सोच्नेहरू
बुझेर पनि बुझ पचाऊन सबले सक्दैनन्
तेसैले केहीले आफै सत्य खोज्नेछन्

ढोंगमा जति बेगले बग्नु छ बग
जति सोहोर्नु छ सोहोर
आखिर बगेर कहाँनै पुग्छौ ?
सोहोरेर कहानै पुर्याउछौ ?
चेतनशीलहरू घस्रेरै पनि
किनार लाग्नेछन्
तेस्तो किनार जसले पुरै नदी अटाउन सक्छ
पुरै समुन्द्र अटाउन सक्छ
बग्ने सोहोर्ने सबको बेग रोक्न सक्छ
हो, केही किनारा लाग्नेछन्
केही किनारा लाग्नेछन् ||

Sunday, February 9, 2014

शब्द र भोगाइ

कसैले लेख्नेछन्
तिमीले बोल्न नसकेका कुरा
कहिलेकाँही त्यसरी लेख्नेछन्
जसरी तिमीले भन्न चाहेथ्यौ

तिमीलाई लागेका जस्तै कुरा
तिम्रा जस्तै भावना
तिम्रै जस्तै बुझाई
कतै कतै कसैन कसैले लेखिसके
कि लेख्नेछन्  भविष्यमा

अनि जब तिमीले पढ्नेछौ ति शब्दहरू
तिनले छुनेछन् तिम्रो मन
याद गराउनेछन् तिम्रा अनुभवहरू
बिल्क्कुल तिम्रो जस्तो अनुभब नहुँदा पनि
तिनले तिमीलाई दिनेछन् एउटा नौलो अनुभब

शब्दमा रहेका क्षणका अवशेष
पढाईसँगै ताजा अनि गाढा हुने गर्छन्
शब्दमा व्यक्त नभएका भोगाइहरू
नभोग्नेहरूबाट टाढा हुने गर्छन्